Birthday kan lawm tam ber, a birthday neitu dam lai ngeia kan lawm thin angah hi chuan a birthday neitu tana duhsakna hlanin theih ang angin thilpêk kan inpe a. Hlim takin hun kan hmangho thîn a ni. An thih hnua an birthday lawm zui tlâk Pu Gandhi-ate ang chu an birthday a lo thlenin an dam laia an thiltih ropuite kan sawi chhuak thar leh thîn.
Lei mi ropui Pu Gandhia chu a birthday-ah chuan a nu leh pate, a unaute leh laichîn dangte hming leh, a lo pianna khua leh hospital awmna pawh hre hauh lo mah ila, a birthday a lo thlen apiang hian rual pâwl phâk lo keini ang thleng pawhin a hnathawh zawhsâa lêng kan nih kan chiang a. A zirtîrna te kan ngaisang thar leh thîn. A birthday lâwma zah leh chawimawina thilhlan petute zîngah meuh pawh a lo pian dan leh seilen dan ai mahin a zirtirna leh a hnathawh ropui tak takte chuan sawi nawn a hlawh fo bawk.
Isua Krista birthday lawmnaah erawh chuan, amah ngaisângtute’n ropui takin ruaipui nen a birthday an lâwm kum tin thîn a. Mahse, kum ruk kalta vel atanga mak ka tih tâk deuh riau chu: mi tam ber hian, keimah ngei pawh hi telin Krismas apiangin Isua hi kan lo chei nausên thar deuh tlata lang hi a ni.
A nuin a lo pai tan dante, a nu leh pa chanchin tlêm azâwngte, a lo pian dân leh Pathian zâwlneite’n a lo pian tur thu an hrilh lâwknate, etc. hi mihring satliah mai a nih loh avang leh Pathian hnen ata chatuan atana kan dam nana lo kal a nih avangin sawi nawn phû zawng a ni rêng e! Amaherawhchu kan Krismas Rilru hi heta tâwp mai tur hi a ni lo vang.
A birthday tûka ‘Nausên / Nau piang Chibai Bûkna’ thawhlâwm bâwmte hi... Krismas-ah hian nau piang, chibai bûk tlâk an awm thar te a nih loh chuan “Lalber Chibai Bûkna” tia thlâk tur a ni lo maw? Nge Isua Krista hi kan ngai nausên thar leh ziah zâwk? A upat tawh tehrêng nên. I birthday lâwm ni ta se mak i ti viau lo’ng maw? Pu Gandhi-a birthday-ah hian a pian lai thu chauh sawiin duhtâwk ziah ta mai ila, “A kim lo mang e,” kan tih vek ka ring.
Mihring kum chhiar pawhin kan Lal Isua kum hi kum 2000 aiin a tam tawh hrim hrim a. “Alpha leh Omega – a bul leh a tâwp” a la ni zâwk lehnghal. Nausên chumchiap mai ni tawh lovin, kan chhandamna atana tûl zawng zawng a hlen chhuak a, a thih chhan mihringa sualna zungkaih leh Setana thiltihtheihna zawng zawng hneh mâm paka Hnehtu Ropui nia a tho lehin, Amah rinchhantu apiangte chu Ama nun tâwmtîra NUN THAR pe mêktu a ni a, vân hmunahte khian thiltihtheihnate leh Vantirhkohte pawh ama thu thu-a awmtîr mêkin a awm a. Ama insawi dan takin “Lei leh vana thuneihna zawng zawng neitu” a ni tawp tawh mai a ni.
Eng kan ti nge Krismas a lo thlen apianga chutiang Lal ropui Isua Krista chu nausên, engmah ti thei lo, ran chaw pêkna thlênga mû anga kan lo mitthlâ thar leh ziah \hin hi le? Kawtthler remchang lai leh Biak In tualahte meuh pawh a pian lai min hriattir nawn leh thei lam milem leh milimte kan târ a ni a. A pian ngei zia hi tihchian kan tum em ni? A pianna bâwr vel thu lo a chanchin dang sawi chu Krismas lo riauvin kan hre lehnghal a. Hei vângte hian a nih ka ring hial thîn – Krismas bawra sual hnathawh a pun hluai thin hi! Krismas apiangin a ‘chumchiap’ thar leh ziah si alâwm! A hnathawhah hian kan la lêng chiang lo a ni mai zâwk ang em? tihte pawh ngaihtuah theih tak a ni.
Aw le, kumin Krismas kan hma maia Lalpa’n min lo chhawpsak leh reng tawh hi a hmangtu tur Kristian zawng zawngte’n kan Lalpa, Tholeh Krista Isua hi mitthlâ-nausên mai tawh lo ila, a pian laia chanchin ngawt ni lovin, “A mite sual laka chhandamtu a nih thu” te hi ngaihtuah ber zâwk ila. A pianphung kan miththla dawn a nih pawhin nausên ang ni lovin, lei leh vana Lalber leh rorêltu, mihringte hmangaihnaa khat, Amah dotute tân kan ral hmang mei ni bawk si, a lalthuttlenga ropui taka, seraphim leh cherub te’n an hual khup mai laite hi mitthla zawk ila kan ringtu nun pawh hi a chakin kan thlamuang deuh zâwk ang a!
Mihring zinga mi ropui pakhat ni chauh Gandhi-a pawh a birthday-ah a hnathawh zâr zotute’n a hnathawh ropui kan sawi nawn leh thîn a ni a. Krista hnathawh zârzotu kan nih ngai chuan, A birthday lawmnaah hian a pianna thu chauh ni lovin a hnathawh ropui te leh a zâr kan zona hrang hrangte hi sawi uar tel tawh ila. Krismas tûka Ama puala thawhlâwm bâwm kan hûn leh tur pawh hi ‘naupiang / nausên / Lal piang’ etc. ni tawh lovin ‘Lei leh Vâna Lalber chibai bûkna thawhlâwm bâwm’ ni tawh rawh se.
No comments:
Post a Comment