PATHIAN THU KAN ZIR LEH NGAIHTHLAK DAN HI

PATHIAN THU KAN ZIR LEH NGAIHTHLAK DAN HI

Kumina kan Kohhran Puitling Sunday School Zirlai hi a buatsaihtu lam chu Pathianin a buatsaih hle turah ngai ila. Kan Mizoram Kristiante tana tangkai tur zir chhuah ngei a duhawm hle mai. Nikumah Chhandamna tih kan zir a. Kha kha atir atangin kan mamawh tak niin a zirtute pawhin Isua mite (Kristian) kan nihna zawna hma kan sawnpui ngei pawh a duhawmin a beiseiawm hle kha a ni a. Eng nge kan anpui tak tih erawh chu mahni kan inhre ber theuh ang a, kan insawi fiahsak thei lovah ngai ila.

Ama'rawhchu, keima mimal thlir dan atang hi chuan, han ti ve khanglang ila, Mizo-te hi 'rei daih lohna hri' hian min man nghet deuh em ni chu a tih theih thinin ka hria. Hman kum lawkah Nilai / Beihrual thupui atan Kristian huaisen leh martarte chanchin ngaihnawm tak kan zir a. Kha khan a zirtute nunah martar huam phahna min neihtir hlawm em aw? tih hi ka ngaihtuah neuh neuh thin a. Kan zir lai pawh khan tum khat chu "Eng atana mi huaisen martar-te chanchin hi zir nge nia kan inhriat hlawm ang aw?" tih ngaihtuahna hian min luah lian hle mai a. Pathian mirinawm leh huaisente chanchin kan zir a, ngaihnawm tak tak vek an ni mai a. Mahse, eng nge kan nih phah tak? tih hi zawhna pawimawh tak niin ka hre thin.

Ngaihnawm ti taka kan zir laite khan tu emaw tal hian, "Hetianga mihuaisente ang hian Lal Isua hi ka'n zui ve tawh teh ang." tih phah kan awm ang em? Nge ni a, an va huaisen bik em! tiin, ngaihnawm ti tak leh Martar-te martar dan leh an huaisen ziate hriat hle kha kan duhtawk mai zawk? Chhiartu duh tak, nang eng nge i rilruah awm le?

Nikum 2011 maia kan zir 'Chhandamna' ah pawh khan mihringte hi sual laka chhandam ngai kan nih thute, kan nun eng pawh mai chhandam a tul thu te, Chhandamtu tak tak chu Lal Isua Krista chauh a nihzia te, Chhandamna chu Pathian min siamsak a nihzia te kan zir a. Hriat pawh kan hre hle bawk turah ngai ila. Mahse, chhandamna awmzia leh mihringin a mamawh dan te etc. etc chu hre hlea kan inngaih lai ngei hian - Chhandam nih hi kan duh tak meuh em? tih bawk hi a pawimawh lai niin ka hre ve tlat thin. Hremhmun laka him duh, mahse sual leh dik lohna zar zo nuam ti, thlahlel leh thlah phal lo tlat si 'Kristian inti' kan tam hle awm e!

Chhandamna chungchang zirzo hlim chauh kan ni chung hian, tuna ka nun hi chhandam nun, ka tawngkam leh chetzia / hawiher te zawng zawng hi chhandam nun / tawngka chhuak leh chetzia a ni em/ tiha buai ta kan awm em le?

Chu lai tak chu a buaithlak lai chu a ni ta a. Thu tha pui pui pawh zirin, Sermon-ah ngaithlain hre hle thin mah ila, kan thu hriatte hi kan nun takah hian kan seng lut ngam lovin, a tam zawkah chuan sawi chhawng ve thei tawka "hria" nih hi kan duhtawk tlat a, KAN NUNAH kan seng lut duh lo reng reng niin a lang. Lalpa Pathian, Vanram neitupa hian Lal Isua chanchin hretute zawng zawng hi a chhandam hauh lo ang bawkin, heng thu ropui tak tak leh ngaihnawm tak takte hretu chauh niha duhtawk a, nun chhungril thlenga seng lut duh hauh lo te hian kan thu ngaihthlak leh hriat, kan Sunday School Zirlaite leh Nilai Thupui-te thleng hian kan sawtpui vak lo leh thin a ni.

Kumin (2012) puitling zirlai pawh hi - Lalpa a thutiama a din ngheh zia te, mihringte a hmangaih zia leh a thianghlim zia te, Pathian thianghlim leh thiltithei, finna leh remhriatna zawng zawng neitu, a duh apiang tihlawhchham ngai lo a nih dan te leh, a hmangaih mihring, mahni kawnga tisa mit leh hriatna ring tlata peng bo reng mai thinte Nunna Kawnga hruai a duh ziate, a hmaah chuan keini a laka 'thi tawh leh rimchhia, thianghlim lo' kan nih avanga kan mihring pianpui nun hi kan roh tlat chhung chuan a huang chhung ata "Dai pawnah" paih chhuah kan ni reng dawn tihte, chuti chunga min hmangaihna nasa tak avanga chatuan atana min neih hlen theih nana min tihthianghlim a duhzia te kan zir chho leh dawn a ni a. Chungte chu zir chhuak a, Ama lam tang chunga mahni theuh hi indo nachang kan hriat phah a duhawm hle mai. Sawichhawn tur hre tawka zir kan duhtawk leh chauh a nih chuan a zia lo leh hle dawn a ni. Pathian khawngaihna zarah kan nunah Lalpa Ram zauh phah se a duhawm hle mai.